Franco Blefari, scrive una favola di Natale dei giorni nostri al contrario.
‘Nc’è ‘nu rumenu cu ‘na caja all’anca,
chi dormi comu fussi ‘nta ‘nu jazzu;
staci ‘nta ‘nu catoju aundi manca
acqua, bagnu, correnti e materazzu.
Non cerca nenti e nenti vol’’i sapi,
non dici non cu esti e cu’ non esti;
cu’ dici ch’era ‘nu guardianu ‘i crapi
e cu’ ‘nu mangiafocu ‘nta li festi.
Però ndavi mbigliati avant’’a porta,
chi nugliu si capacita chi ennu,
fogghj’’i giornali e cosi d’ogni sorta,
chi unu non sapi s’è malat’ ‘i sennu.
‘A genti passa… e faci ca n’’o vidi,
non pensa non si mangia o si ddijuna,
ca unu a stamanera non si cridi
ca staci senza stufa e non carbuna.
‘A genti è orba, è senza cuscienza,
si tutt’’u jornu lu vidi gliavanti;
passa…e mancu si duna cumpidenza,
cu tanti casi chi sunnu vacanti.
Si ‘a dominica jamu sempi ‘a misssa
e ndi cumunicamu glià ll’artaru,
quand’è chi mori “gliu povaru fissa”,
‘u prim’’i mia, non si dicimu “amaru”?